CERPEN

Wak Saleh Milih Mantu

16 Feb 2017 | 17:34 Diperbarui : 16 Feb 2017 | 18:11 Dibaca : Komentar : Nilai :
Dok.pribadi

Sudah saban hari ini Nyak Kareminah, bini Wak Muhammad Saleh pulang-nganting kayak setrikaan di depan rumah, nengok ke jalan sambil ngelinting-ngelingting ujung kebaya encim, nunggu-nunggu Raihana Kumbara belum balik juga.

Itu anak perawannya, sudah sedari siang tadi pamit dibawa jalan sama anak bujang, anak siapa tahu! Belum balik juga, sampai hari sudah mau magribh.

"Mau selop situh dobol juga nyak, pulang-nganting dari ruang tamu ke depan teras rumah!” Tegur Wak Saleh, lakinya Kareminah, yang duduk selonjoran di bale kipas-kipas, pakai kipas anyaman bambu, lalu lanjut ngomong, “kalau itu anak belum waktunya datang, kagak bakal ngaruh, nyak!"

Belum mingkem mulut Wak Saleh, sedan silver meluncur ke depan rumah, mengantar anak perawan mereka pulang. Lalu keluar keduanya diantar anak bujang yang cakep banget, Byron Khafka.

"Asalamuallaikum Beh, ini Byron!" Kata anak bujang itu, menghampiri Emak-Babeh di depan rumah yang menyampak kedatangan mereka, sambil bawa duren tiga kepala, lalu dikasih ke Wak Saleh, buat oleh-oleh, "Bawa sana Beh, kupas dulu kalau mau dimakan."

"Jabangbayi!” Rutuk Wak Saleh, “Orok meletek juga tahu makan duren dikupas dulu, Tong! Masa gue mau gerogotin cucuk-cucuknya ni duren beranak!" Wak Saleh gelagat-gelagatnya kayak lagi darting, alias darah tinggi sindrom usia lanjut.

"Terus nih duren, gimana Beh?" Byron menimpali, sekena-kenanya.

"Jabangbayi, elu nyuruh gue tong? Nyelutak amat, siapa elu?! Lah lu bawa sono ke dalem sendiri!"

"Keknya aye salah mulu, Beh?" Sahut Byron, gelagapan salah tingkah menghadapi Babehnya Raihana.

"Siapa yang Babeh? Emang gue siapa elu!" Sahut Wak Saleh, nyolot. Mati lah Byron, rasa-rasanya bakal jadi perkara ini hari.

Raihana menyikut isyarat, supaya si ayank cakepnya Byron Khafka tak menanggapi si Babeh. Perawan cantik itu mecium tangan orangtuanya, "Salamualaikum Nyak-Babeh."

Di teras depan rumah, Byron sama Wak Saleh duduk di bangku kayu bulat berhadapan meja marmer putih. Sementara Raihana sama Enyaknya menyiapkan minuman, sekalian belah duren di dapur, ditaruh di piring kecil buat suguhan bareng kopi.

Dan rasa-rasanya ada yang bakal diobrolkan Wak Saleh sama bininya, pikir Byron yang sedari tadi jadi salah tingkah, sudah kayak kopral menghadapai Jendral.

Wak Saleh langsung buka obrolan tentang, "hubungan elu pada, anak muda!" Kata Wak Saleh, "bukan hanya Nyak lu yang udah kagak nyaman elu pade kelihatan sering bareng. Apa kata tetangga di mari?"

"Ya Beh!" Sahut Byron, menunjukan muka manis dibuat-buat.

Mendadak roman muka Wak Saleh berubah, "Lu masih bukan siapa-siapa gue, Bujang! Semua orang kampung manggil gue, Wak! Elu kagak usah bertingkah dah! Cuma Raihana anak perawan gue yang manggil babeh. Sebelum ijab qabul, kagak ade acara elu manggil-manggil gue babeh."

"Terus aye kudu gimana Beh? Eh Wak!" Byron jadi sibuk meralat, tiap mau ngomong.

Raihana muncul bawa pinggan minuman, dibarengi nyak Kareminah, ikut nimbrung, dan si enyak menerangkan "Maksud Babeh, keluarga lu kudu dimari, ngobrolin hubungan lu ama anak perawan Enyak. Masa elu kagak ngarti sih Tong!"

"Ngelamar maksudnya, Beh?"

"Jangan elu kira gue lagi nawarin anak perawan gua, Byron-Byron!" Sahut Wak Saleh, gagah bener. "Anak perawan gue, banyak yang mau. Si Koko Liem China peranakan yang buka Toko Matrial di ujung perempatan sono, udah ngebet bolak-balik mau ngelamar jadi lakinya si Raihana. Kurang apa tuh si Koko Liem? Pekerja keras, banyak order proyek di pembangunan cukong-cukong yang bikin gedung bertingkat. Jeleknya itu bocah gue perhatiin kalau lagi ngomel ke anak buahnya, mulutnya kek jamban, tapi tegas orangnya. Ape ajeh yang menghalangi usahanya, gusur!"

Lebih lanjut Wak menerangkan, "Cuma itu die," Nada bicaranya lepas, seperti menyayangkan suatu hal, tentang fakta bahwa. "Itu anak statusnya KAFIR! Masa gua kasih anak perawan gua kawin sama laki yang kagak seiman? Haram hukumnye! Masak Kepala Keluarga kafir, mengimami anggota keluarga muslim, kayak kita!" Imbuhnya, "Elu denger gue kagak Byron?"

"Ho'oh Beh, emangan! Eh Wak!"

Nyak Kareminah ikut nimbrung omongan, "Minggu lalu, pak Hidayat datang di mari, nanyain masalah Raihana Kumbara. Walau udah dapet umur, tapi itu laki kapanan seiman, mapan dan baek orangnya. Nah elu, gimana sama Raihana."

Kedua orangtua itu menanyakan kesungguhan Byron, mengenai nasib anaknya, yang memang rada condong ke Byron. Walau itu bujang kelihatan makmur, tapi kayak santai-santai saja dalam gelagatnya di keseharian. Saban hari kayak tidak ada kesibukan, selain nongkrongin Moge kepunyaannya di bengkel modifikasi, atau kelayaban sama anak perawannya ke warung ayam bakar di tegal sebrang.

"Aye tinggal bilang Babeh, wak-nyak!" Sahut Byron.

"Bukan begitu maksudnya, Tong!" Tukas Wak Saleh, gue perhatiin udah dua lebaran Monyet, kagak ada ceritaan elu kerjaannya apa. Elu kayak anak mude kagak punya konsep!"

"Kapanan ada babeh aye, Wak!"

"Muke gile, babeh aye - babeh aye mulu!" Semprot Wak Saleh, "elu emang kagak mandiri, cuma hidup disuapin ama babeh lu, Byron?"

Byron nunduk mingkem.

Wak Saleh, buka lagi omongan, "Sekarang elu balik sono pulang, omongin ini ceritaan sama babeh elu, Tong!"

"I-Iya Beh, eh Wak!" Sahut Byron, beranjak bangkit  pamit cium tangan enyak-babeh Raihana, sekalian pamit sama pacaranya, "Aye pulang dulu, yank."

"Iye bang Byron," sambut Raihana Kumbara, mengambil tangan Byron mau cium tangan pacaranya.

"KAGAK PAKE!" Tepis Wak Saleh ke tangan keduanya, "Elu belum pada jadi mahrom, haram pegang-pegang! Batal wudhu lu!" Lalu melotot ke anak perawannya, "Udah sono ke belakang, ambil wuhdu, bentar lagi Magriban."

***

Sebetulnya bukan sedang memburu-buru anak perawan kawin, tapi, "Masalahnya gue khawatir takut kejadian yang kagak-kagak," Kata Wak Saleh, waktu ngumpulin anak-bininya di ruang tengah, habis shalat magribh. "Udah ada dua laki yang ngelamar elu, Raihana. Dengerin babeh!"

Dan Raihana tahu, keduanya bukan pilihan dia, yang satu Pak Hidayat juragan bandar beras di Pasar-pasar Basah tradisonal. Lain lagi Koko Liem tukang matrial yang sudah barang tentu ditolak haram hukumnya menikahkan anak perawam muslim, buat bakal bini orang kafir.

"Tapi masalahnya," Ujar Wak Saleh lebih lanjut, "Cuma si Koko yang masih bujang, sementara si Dayat, udah duda dua kali. Babeh ogah sampe kagak bener ke depannya."

"Berarti tinggal Byron, Beh!" Raihana menimpali, harap-harap cemas, babeh bakal menyetujui.

"Apaan, dia belum melamar elu!" Tukas Wak Saleh, "Bocah nganggur yang ngandelin duit babehnya ajeh!"

"Ya proses lah beh, kapanan orang kagak langsung berjaye!" Raihana kukuh membela.

"Gini ajeh, kalau ibaratnya si Koko Liem udah kagak bisa kite terima lantaran kafir, pilihannya cuma di antara dua. Si Dayat duda pengusaha, atau si Byron anak babehnye? Siapa yang duluan, itu yang bebeh terima. Biar kagak ada gosip sekampung ngocehin anak kita, nyak!" Sambil melengok ke muka bininya, minta dukungan.

"Tuh dengerin!" Sela nyak Kareminah pada anak perawannya.

"Iyeh nyak, beh!"

***

Tiga minggu habis obrolan itu, info sudah sampai ke kedua calon mantu, satu ditolak, yang lain diterima. Masalahnya kaget bukan kepalang, menjelang hari H, kedua-duanya muncul di alun-alun, bawa arak-arakan rebana, sama roti buaya.

"Lah Ini bagaimana?" Sahut Engkong Raka Kelana, di ruang keluarga yang sudah siap menyampak tamu, dengan jamuan dan pakaian adat Betawi. Ia adalah kakek Raihana yang kini ditugaskan sebagai penerima tamu pada acara.

Engkong Raka langsung masuk ke dalam rumah di antara tamu, "Si Hidayat sama Byron ngapah jadi jalan bareng arak-arakan, Saleh?" Tegurnya kepada orang tua Raihana.

Nyak Kareminah panik, menengok muka lakinya di sebelah ia berdiri, "Lah Babeh, emang siapa yang diterima pas ngasih Info?"

"Babeh nerima tilphon babehnya si Byron!" Tandas Wak Saleh, melongo.

Tak ada waktu lagi berdebat, Kong Raka lekas menyampak para tamu dengan iring-iringannya, lalu di terima di ruang tengah tergelar tikar pandan, di antara para tamu dan sesuguhan serta seserahan dari keluarga calon besan yang mau melamar bakal jadi mantu.

Kong Raka menyela, "Asalamuallaikum sodare-sodare, ini siapa yang mau meminang anak perawan kami Raihana Kumbara?"

"Saya!" Sahut pak Hidayat, lelaki berjas Ujungserong layaknya demang, gagah bersetelah pantolan hitam duduk bersila di tengah para tamu, sementara Byron di sebelahnya mengenakan koko bertawi menyoren sarung di bahu.

"Lah aye kapanan mengundang keluarga Byron?" Sambung Kong Raka, sebagai juru bicara keluarga.

"Aye Babehnya Byron Khafka! Mau minang anak perawan sodara, bakal jadi istri anak aye, sodara."


***

Beuh! Rutuk hati Wak Saleh, "anak-babeh sama ajeh!"

#AbyKahfi

KOMPASIANA ADALAH PLATFORM BLOG, SETIAP ARTIKEL MENJADI TANGGUNGJAWAB PENULIS.